Asid

Kisa Reflux Asid ye? (Sa w rele kè boule a)

Reflux asid (yo rele li tou reflux gastro-œsophagyen) se lè asid nan lestomak ou monte nan gòj ou (œsophage), ki se tib ki konekte bouch ou ak lestomak ou. Si sa rive souvan (plis pase 2 fwa pa semèn), sa ka vin yon maladi ki rele GERD (Maladi Reflux Gastro-Œsophagyen).

Sentòm asid lestomak yo:

• Ou santi lestoma w ap boule w (kè boule)

• Ou santi bouch ou gen gou asid oswa bouch ou anmè

• Ou gen difikilte pou w vale manje

• Remonte manje oswa likid nan bouch ou

• Tous ki pa sispann oswa gòj ki toujou fè mal

• Ou santi tankou w gen yon boul nan gòj ou

Kisa ki ka koz ou fè maladi sa menm?

• Gen yon pati nan gòj nou ki rele (œsophagien sphincter) se li menm ki responsab pou enpeche bagay ki nan vant nou retounen moute nan gòj nou. Si l vin twò fèb li ka vin pa byen fèmen ankò ki vin koz manje yo moute nan pati lestomak nou e menm gòj nou.

• Lè w manje twòp oswa twò lou

• Kouche imedyatman aprè ou fin manje. Se pou sa li rekòmande pou w manje nan pozisyon chita epi pa kouri al kouche la menm ou fin manje. O mwen tann 2zè tan pase apre wa kouche.

• Lè w twò gwo (obèz)

• Ansent

• Fimen

• Lè w manje oubyen bwè bagay ki ka deranje lestomak ou, tankou: bagay ki gen anpil piman bagay ki gen twòp grès, alkòl, kafe, bwason gazez, chokola, sitwon, tomat

• Gen kèk medikaman tankou aspirin, ibipwofèn, medikaman tansyon ak lòt ki ka koz sa tou.

Sa w ka fè pou geri asid (REFLUX ACID)

Chanjman mòd vi w enpòtan anpil

• Lè yo ba w yon gwo plat manje pa desann tout ton sèl kou, pran l tikal pa tikal, konsa w ap bay sistèm dijestiv ou plis tan pou l dijere manje a

• Evite manje bagay ou konnen ki gen twòp piman, twòp grès ak lòt sa ki sot site anlè yo

• Pa kouri kouche lamenm ou fin manje, tann pi piti 2zè tan

• Lè w kouche bat pou tèt ou wo

• Si w twò gwo eseye fè spò pou w kraze nan gwosè a

• Sispann fimen (si w fimen)

• Mete rad ki pa twò sere w

Medikaman

• Antasid (egzanp: Tums, Rolaids) –

• Bloke asid (H2 blokè) (egzanp: ranitidin, famotidin) – diminye pwodiksyon asid

• Inibitè ponp protonu (PPI) (egzanp: omeprazole, esomeprazole) – kontwole asid

• Pwokinetik – ede lestomak ou vid pi vit (yo itilize sa mwens souvan akoz efè segondè)

Chiriji (pou ka ki grav se opersayon sèlman ki ka sove w)

• Fonoplikasyon – chiriji kote yo vlope yon pati nan lestomak ou sou tib gòj ou pou l fèmen pi byen konsa pou manje pa ka remoute ak fasilite ankò.

Si je w tonbe sou medikaman sa yo epi w gen pwoblèm asid pa ezite achte yo. Byenke li t ap toujou pi bon si w al lopital epi yon doktè preskri w medikaman espesifik selon ka pa w la.